政情：何君堯周永健合唱冧長者
香港律師會前會長何君堯尋日舉行新書發布會，除咗介紹新書，會上另一亮點就係佢同香港賽馬會副主席周永健合唱。其實發布會本身已經有人表演唱歌，但台下嘉賓及長者似乎好想聽到佢哋大展歌喉，於是二人就合唱咗一首經典英文歌《Let it be》。可能事前冇夾過啦，唱唱吓有啲甩Beat，但嘉賓一樣聽到好陶醉，仲大叫「encore」添。
原來尋日係周永健生日，咁啱何君堯又係六月壽星仔，所以大會準備咗唔少蛋糕，同兩位壽星仔及六月生日嘅長者嘉賓一齊慶祝。何君堯亦好識做，準備咗利是派畀一眾壽星仔女，氹到個個都好開心。
何揚言唔入政黨
之前有傳自由黨向何君堯招手，但佢一直未有回應呢個講法。佢尋日終於親自解畫，表明唔會加入任何政黨，強調冇政黨取向，認為香港最重要係「real team work」，即係團結一致咁話。何承認自由黨對佢唔錯，但就話支持該黨唔一定要加入。