政情：勁敵棄選 李梓敬勝算增

去年政圈傳出李梓敬空降又一村選區，初頭形勢不被看好，因為郭振華喺又一村扎根多年，加上郭又係深水埗區議會主席，呢個位不容有失，照計選情應該幾穩陣。但政治形勢永遠係千變萬化，最近有線報就話郭振華已決定唔選區議會，真正退出政壇，聽講呢個決定連所屬政團都知悉。

郭振華考慮退休

我哋問過郭振華，佢承認考慮緊退休，而呢個諗法過去幾年都諗咗好耐，唔係一時三刻嘅決定，更加唔關選舉勝算嘅事。不過，無咗郭振華呢位現任對手，又唔代表李梓敬可以自動當選，因為社民連決定派出新人周嘉發狙擊李梓敬，令呢場區選由中產之爭變成左翼（社民連）同右翼（自由黨）大決鬥。到底鹿死誰手，過多幾個月就知。