政情:惡人先告狀何麒厚顏

公民黨立法會議員郭家麒同助理早前運送燃油發電機進入立法會大樓,有閉路電視錄影截圖作證「斷正」,事後更被發現疑將燃油倒入坐廁,認真缺德。立法會行政管理委員會(行管會)經討論後,決定向郭家麒發出警告信,要求佢唔好再犯。但係郭家麒仍然死撐唔肯道歉,仲「惡人先告狀」批評有行管會成員外洩閉路電視錄影截圖,佢哋應該道歉,企圖轉移視線。

死撐未收到警告信

行管會尋日開會後,決定對郭家麒發警告信,要求佢唔可以再帶違禁品進入立法會大樓。郭家麒就話未收到行管會封警告信,話其職員無意帶易燃物品進入大樓,只係因為要測試新嘅發電機,所以先帶咗電油入內,無諗過會影響安全喎。講嚟講去,佢都係唔認有錯,亦無就事件道歉,反而批評行管會嗰班議員公開閉路電視錄影截圖,唔肯認、又唔肯道歉,係不負責任同侵犯私隱喎。

據理解,依家未有行管會成員承認外洩閉路電視錄影截圖。行管會就話,呢啲資料都要保密,唔可以隨便公開,提醒議員如果外洩資料嘅話,都要負上責任。不過,有建制派議員認為,呢啲資料涉及公眾利益,唔應該隱瞞。亦有議員話,應該一筆還一筆,認為郭家麒犯錯就要企定認錯兼道歉。

泛民經常有錯唔認

記得民主黨議員胡志偉去年底亦試過喺大樓內開動燃油發電機,釋出陣陣濃烈臭味,被誤以為發生火警,但當時佢亦係道歉都無句,加上今次事件,泛民十足攞正牌做違規事情。

另外,工黨議員張超雄亦去信行管會,話之前審議政改方案期間,立法會發出黃色警示,阻礙議員入議會嘅權利。不過,立法會法律顧問就反駁話,當時所有人都要接受安檢,包括議員及官員,咁樣並非阻到議員開唔到會,只係造成少少不便啫。法律顧問又話,如果緊急時,例如投票鐘聲響起,就會畀議員先入會議廳,再返回補做安檢,並非完全不合理限制,相信唔會違反《立法會(權力及特權)條例》。

第一手消息請下載on.cc東網iPhone/iPad/Android/Windows Phone Apps