中環出更：總商會高層拒聲援林健鋒
立法會總商會代表林健鋒（Jeffrey）因為喺政改表決時要「等埋發叔」，結果建制派拉隊離場，導致得八名建制派議員投支持票，釀成甩轆大災難。事後總商會內部成員好不滿Jeffrey表現，覺得係時候要換人。尋日Jeffrey被問及會否辭去行政會議成員一職，佢無直接回應，只係話現時社會有好大紛爭同分歧，做議員應該集中精力協助政府改善民生。聽Jeffrey口氣，唔通佢想當無事發生過？
內部分撐反陣營
雖然Jeffrey唔肯透露會否辭去行會職務，或者來屆立法會選舉讓位畀其他人，但聞說總商會內部已因為呢件事分成兩大陣營，一部分認為Jeffrey只係小錯失，唔諗住追究，但亦有人認為Jeffrey犯下大錯，唔應該再畀佢代表總商會。
尋日總商會舉行講座，多名資深會員都有出席，但佢哋一律封口，都唔肯開腔撐Jeffrey，某程度反映部分商會人士嘅想法。例如總商會常務副主席吳天海就話自己無意見，被追問係咪唔撐Jeffrey，佢就話唔評論。
至於盛傳有機會取代Jeffrey成為下屆立法會議員嘅理事余鵬春，尋日亦有現身，但佢就封口唔講嘢。兩大總商會元老拒撐Jeffrey，連行政總裁袁莎妮都話唔再評論，似乎Jeffrey今次要諗定後路至得。
卓妮