中環出更：名人買畫行善揚惜食助復修
有百年歷史嘅中環花園道梅夫人婦女會（婦女會）早前舉行一場慈善畫展，開幕當日，川流不息嘅政商界名人喺婦女會會所逼到水洩不通，唔少人一入場就急不及待揀選心水畫作，個個好似預咗買畫做善事。點解大家咁慷慨？因為今次賣畫所得一半收益會捐畀創辦惜食堂嘅小寶慈善基金，另一半就捐畀婦女會做復修經費。
梅夫人婦女會大樓百周年
婦女會副主席Diane O'Hare話，屬英式大宅嘅梅夫人婦女會主體樓係香港法定古蹟，今年將慶祝落成啟用一百周年。惟由於落成時間太耐，好多地方需要執執佢，所以希望籌款以便進行復修，為香港保育文化盡一分力。
小寶慈善基金創辦人董愛麗（Gigi）都有到場，佢話今次慈善畫展嘅畫家係業餘嘅銀行界高層梁偉文（Kaven），Kaven亦係小寶慈善基金董事會成員，所以梗要嚟支持啦。見到滿室靚畫，Gigi最欣賞《沙漠極光》畫作，點解？唔通佢去過沙漠旅行？Gigi笑笑口話，佢啱啱去完杜拜返港，感覺好正喎！
Gigi又講開旗下惜食堂，現時每日提供六千個愛心飯盒，但廚房仍有增加二、三千個飯盒嘅處理空間，所以希望多啲飲食界認識佢哋，提供新鮮剩食以便幫助有需要人士。
當日好多金融界人士都有去捧場，包括財經事務及庫務局局長陳家強、資深銀行家陳子政等人。Kaven講起點解開始繪畫，原來係因為佢陪讀小學嘅囡囡參加繪畫班，估唔到自此進入咗色彩繽紛嘅世界，畫到停唔到手。佢話透過繪畫發現人生充滿色彩，寄語壓力爆煲嘅港人出去睇吓世界，唔好困喺香港惡鬥咁話。
卓妮