唔知幾時開始，香港由「旅遊之都」變成「水客之都」，水貨客固然通街都係，水貨品種更加係包羅萬有，有人甚至成為「貨幣水客」，專門走私現鈔，問你服未！
即係咁，香港對跨境現鈔流轉並無規管，但內地及台灣等地就有嚴格規定，兩岸三地法律上嘅差異，導致走私客有機可乘。呢，早排內地當局喺一架由香港赴內地嘅七人車內，發現四百萬港元現鈔，事主聲稱巨款用於深圳置業喎；而月前皇崗海關亦截獲一名返香港嘅女子，身上綁有約值四十一萬港元嘅港幣及歐元現鈔，十足「人肉解款車」，揭發內地嘅地下錢莊聘請「貨幣水客」走私現鈔。
其實，呢類個案不過係冰山一角咋，內地皇崗海關數據顯示，近三個月涉及攜帶過量現金出入境嘅案件已有三十六宗，總值超過四千萬元人民幣，試過一周內拘捕八名受僱於地下錢莊嘅香港人。而本港海關前線人員亦披露，曾親眼見到內地旅客將數百萬元現鈔放入手提行李篋帶過關，都咪話唔誇張。
點解走私貨幣咁猖狂？原因好簡單，香港中門大開，完全毋須申報，係全球罕見冇設立出入境現金申報制度嘅地區，為跨境洗黑錢提供方便之門。冇錯，香港係自由港，不設外匯管制，好似理直氣壯咁，但任由黑錢自出自入，即係變相令香港淪為洗錢天堂，好有問題啫。退一步講，就算攜帶大量現鈔來港未必涉及洗黑錢，亦唔代表冇問題，隨時影響金融市場穩定o架。
可能係洗錢問題損害香港聲譽啩，港府有意亡羊補牢，準備根據國際組織打擊清洗黑錢嘅相關建議，實施攜帶大額現金出入境申報制度，下月展開公衆諮詢，預計將過關需要申報嘅現鈔總值定喺「稍高於十萬港元」，違者處以定額罰款，最快一八年實施咁話。嗱，遲到好過冇到，港府終於肯正視問題堵塞漏洞，總好過乜都唔做，最緊要依法辦事，嚴格執法，否則有法例等於冇法例嘅咋。
係人都知，內地貪官多不勝數，為咗避人耳目，千方百計轉移財產，香港近水樓台，早就成為貪官洗錢天堂。內地央行報告曾披露，從上世紀九十年代中期至○八年，內地有一萬八千名貪官外逃，捲走八千億元人民幣，而香港正正係貪官財富外逃嘅主要中轉站。所以話，無論從維護香港本身聲譽出發，或者為配合內地反貪着想，港府都有必要採取措施補救。總而言之，自由港唔代表乜都可以放任自流，國際金融中心嘅金漆招牌來之不易，千祈唔好自毀根基吖！