港鐵將於今日起平均加價百分之四點三；去年勁賺一百五十六億元嘅港鐵，按「可加可減」機制連續第六年在賺大錢下加價。
所謂「可加可減」已變成「只加不減」，多名立法會議員批評港鐵在巨額盈利下仍加價是不合理，促請港鐵提早檢討有關機制，而多個團體抗議港鐵加價無視市民負擔，港鐵最好的做法──起碼凍結票價，直接惠及市民，有成員高呼「濫用機制加咁多，全數回饋莫再拖」！這也正是老朽嘅心聲，相信亦是大多數市民嘅心聲！
老朽早在二○一一年三月二十七日已指出所謂「可加可減」係混吉機制，每次港鐵劏客都冠冕堂皇抬出體面嘅「可加可減機制」，並千般委屈咁呻基於尊重「合約精神」；而究其實卻是在不合時宜嘅制度下，變成無王管機制，一味要賺到盡，完全沒有考慮其社會責任。
港鐵明明「算死草」，推出嘅乘車優惠不全面和欠缺吸引力，有議員建議港鐵理應將現行早晨折扣優惠，擴展至全線車站及黃昏繁忙時段；然而，運輸及房屋局副局長邱誠武卻認為「港鐵能加價，反映本港經濟好，是『香港嘅福氣』。」云云。邱副局長作為問責官員，本應為民發聲，監管港鐵採取補救措施，遏止港鐵嘅畸形可加不減收費及穩定票價至係波，誰知佢竟然不知民間疾苦，不食人間煙火，不知普羅大眾在衣食住行樣樣加嘅壓力下，尤其「行」也構成一筆頗大嘅必要開支，竟講出昔日白癡晉惠帝嘅說話「何不食肉糜」，爭在未講「貴咩？自己揸私家車囉！」嘅廢噏！
唐太宗講過：「今之將臣，雖未能知彼，苟能知己，則安有不利乎？」看來，邱誠武副局長不但未能知彼，更不能知己，反映政府養一大班庸才，是香港嘅災難！