政情：八網難逃：阿Ann獲鼓勵「過咗端午就鬱完」

建制派上周四喺立法會表決政改方案時發生「甩轆」事件後，要喊嘅議員已經喊晒，得戚嘅泛民主派議員亦把握機會踩到盡。適逢尋日係端午節，有份離場無份投票嘅民建聯蔣麗芸（阿Ann）再喺社交網站留言，話有朋友發訊息鼓勵佢哋班建制派議員要振作，話端午節俗稱屈原節，過咗端午節就屈原（鬱完）嘞，即係憂鬱完咁解，要重新振作，仲送上歌星甄妮嘅首本名曲《奮鬥》畀佢哋聽添！不過，即使歌詞鼓勵大家「寧願奮鬥到百千次，創出幸福快樂鄉」，但現實係唔知幾時會重啟政改，想奮鬥都無機會呀！