政情：夏千福又出動 聞政改封口
落區做騷幾乎多過返工嘅「小八國聯軍首領」、美國駐港總領事夏千福，尋日趁端午節又再出動，輕裝上陣出席赤柱國際龍舟錦標賽。夏千福話上任兩年，親身睇龍舟競渡都係第一次，仲大晒廣東話玩親民。講起香港政改被否決，泛民主派應否再同港府就政改溝通，夏千福就即時封口，唔敢講太多，只係話相信泛民自有決定，美方亦已表態支持落實普選，佢個人冇補充，只係想享受賽事同食糉喎。
問人游咗「燶周衰」未
夏千福唔敢講政改都可以理解，事關老美講明下周會舉行新一輪中美戰略與經濟對話，香港民主發展將會係議題之一，夏千福做細嘅，當然要乖乖聽候最高指令啦，萬一亂噏廿四壞咗大事，點擔當得起呀。雖然夏千福唔敢講政改，但就好樂意狂晒半鹹淡嘅廣東話拉近同市民距離，好似講吓「未食五月糉，寒衣勿收櫳」呢啲俚語，又祝大家「歡度端陽」，仲問游咗「燶周衰」（龍舟水）未添，但佢自己就唔落水。