原本敲定周五第三度向立法會財務委員會闖關嘅創新及科技局（創科局）撥款申請，前日突然讓路予十一項民生項目撥款，要趕及立法會下月休會前成立創科局似乎再有阻滯。「疑似」局長楊偉雄早前因為遲遲未開局，而獲政府委任行政會議成員及特首創新及科技顧問「做住先」，最近就好似攞正局長牌咁四出同立法會議員見面，慢慢熱身為正式加入熱廚房做準備。
據悉，楊偉雄喺力撐創科局嘅資訊科技及廣播事務委員會主席葛珮帆（EQ）拉線下，已經即時逐個約見泛民主派議員，想提早同佢哋打聲招呼，熟悉吓對方脾性及釋除開局疑慮，日後有咩都可以坐低慢慢傾。據知除咗個別議員回覆唔使見，楊偉雄已經密密見咗十二人，有六個仲排緊隊。
不過，聽聞楊偉雄因為唔係政界出身，對香港選舉制度唔係好熟悉，連地區直選同功能界別議員都未完全分得清楚，因此會面前都要做定功課，了解對方關心咩科技議題，以免會面時「搭錯線」，好彩唔少泛民議員同楊偉雄會面後反應都幾正面。