政情：弘揚真相 煞廷癡夢

戴仍幻想等待下次契機

戴耀廷尋日喺電台節目話，對香港有民主仍然感到樂觀，因為喺佔領行動期間，見到有走出來嘅青年人、堅持唔放棄嘅老人家及一班市民，佢哋喺抗議行動期間自發草擬民間約章監察政府，從佢哋身上可以見到香港民主嘅希望，覺得港人已經政治醒覺。佢仲話，喺等候下一次政改契機來臨前，最重要係諗方法重新建立能夠將各民主力量聯繫嘅橋樑，同培養港人有自主自決嘅管治能力喎。

陳撐集中處理民生經濟

不過，陳弘毅就同戴耀廷嘅諗法相反喇，佢認為政改否決之後，民主發展主要視乎市民喺明年立法會選舉嘅選擇。如果人大「八•三一」決定同中央對港政策都唔變嘅話，政改日後同樣係難以得到共識，政改喺立法會依然係得唔到三分之二議員支持，現有政制喺可見嘅將來可能都係維持不變。佢又認為，經歷兩、三年嘅政改過程後，市民都好厭倦喇，希望立法會能夠正常運作，本屆政府喺餘下任期亦應該集中處理經濟民生，相信此舉會得到市民支持。

其實政府早已表明否決政改後唔會有「Plan B」，只會追番時間專注發展經濟民生。基本法委員會主任李飛亦都表明人大「八•三一」決定不存在未實施就加以改變嘅可能性，就算日後再推行特首普選方案，「八•三一」決定仍然有效，所以陳弘毅嘅講法並唔係一時悲觀。可惜戴耀廷以至一眾泛民仍心存幻想，寧為玉碎、不作瓦全，堅持一步到位，睇嚟陳弘毅都好難摑得醒戴耀廷同班泛民嘞。