中環出更：財爺頒獎 唔等埋發叔
一年一度嘅屯門區龍舟競賽尋日喺屯門青山灣舉行，近日已經多次甩底公開活動嘅屯門區議會主席兼屯門鄉事委員會主席劉皇發（發叔）又再無影，連發叔個仔、新任鄉議局主席劉業強（Kenneth）都學足老竇玩甩底。難得財政司司長曾俊華（鬍鬚曾）出席頒獎禮，但望住一張張丟空咗無人坐嘅櫈都認真無癮，唔怪得頒獎嗰陣都拒絕「等埋發叔」，頒完獎即閃。
「發仔」都無影
屯門區龍舟競賽話晒係發迹屯門嘅發叔搞起先，加上佢兼任屯門區龍舟競賽委員會永遠會長，大會事前都準備好名牌等發叔大駕光臨。不過，最近唔係幾舒服嘅發叔唔知係咪因為政改表決人人都話等埋佢，尋日索性唔到，據知原本由Kenneth幫爸爸補位，但臨門一腳都係缺席，好似今日先趕得切返港。
玩開劍擊嘅鬍鬚曾對比賽就唔係好有興趣，好快頒完獎就走人，卓妮乘機問鬍鬚曾做咩唔「等埋發叔」呀？佢只係笑笑口問「發叔？」然後就封口。都啱嘅，既然發叔咁難等，都係唔等好過啲。
卓妮