中環出更：青出於藍 龍舟賽奪冠圓夢
尋日係有紀錄以來最炎熱嘅端午節，但仍無阻健兒參加龍舟競渡嘅熱情。好似中華廠商聯合會（廠商會）一班青委會成員，即使輸咗三年，但仍再接再厲參賽，終於以半秒之差力壓對手奪冠，難掩喜悅之情。今年繼續由擁有逾七年扒龍舟經驗嘅胡子歧擔任廠商會隊伍教練，佢話今年特別加強咗隊員耐力及體能訓練，奪得冠軍真係好開心。
今年係廠商會青委第四年參加端午龍舟競渡，過往佢哋都同獎項擦身而過，去年更加只係差零點零一秒而失落季軍，今次終於喺男女混合銅碟賽中奪冠，賽後一眾隊員興奮到互淋香檳添！點解佢哋咁興奮呢？原來去年已經諗住攞個獎作為廠商會成立八十周年嘅賀禮，今年終於不負所望奪冠，胡子歧話未為晚也，算係一份遲來嘅賀壽。
出動兩艘遊艇打氣
廠商會兩名副會長吳永嘉（Jimmy）及徐晉暉（Marvin）亦有撐場，佢哋大讚青委鍥而不捨嘅精神，見證咗多年努力嘅成果，希望大家以後更加團結。為咗答謝青委嘅努力，尋晚二人仲出錢搞慶功宴，相信場面一定好熱鬧。Jimmy話，雖然自己會暈船浪，但年年都會上船為大家打氣，今年更出動兩艘遊艇，落重本打氣。至於廠商會會長李秀恒及青委會主席張永鴻咁啱去咗天津公幹，未能見證青委奪冠一刻。
另外，過兩日就係青委會副主席顏明秀嘅生日，佢話攞獎係預早幫佢慶祝生日，亦完成咗生日願望。另一副主席王詩雅就話，最初對扒龍舟一竅不通，亦覺得無可能攞獎，所以今次奪冠覺得好感動。
卓妮