講故事拉近關係 父親節享天倫樂

入院換心 兒剛出世

梓謙憶述○三年正值沙士高峰期發病，「當時同沙士病徵好似，咳嗽帶血、個肺花晒」，需入院檢查治療，卻被確診為心臟衰竭。惟當時只有廿四歲的梓謙認為，「做多啲運動，食得健康啲，定時食藥就可以控制到病情」，期間仍自覺與正常人無異，一直工作，其妻更於○七年誕下一子。

惜一年後，梓謙病情急轉直下，「開始行唔到，塊面黑晒，嘴唇變咗紫色」，需入院等待心臟移植手術才能續命。他坦言，在留院期間曾一度感到迷惘和絕望，「好多次幾乎支撐唔到，咁少人捐器官，唔知等到幾時」。梓謙一臉愁容續指，由於住院的一年不能與兒子見面，曾有「見唔番個仔嘅感覺」，並開始為生下稚子的決定而後悔，「大家都唔知下一步會點，唔知呢個決定啱唔啱」。最終梓謙憑着信仰、朋友支持，以及「想見番個仔」，並未放棄，更於○九年得到適合的心臟移植。

一年後歸家「唔知邊個嚟」

梓謙換心後滿懷歡喜歸家，惜迎接他的兩歲半兒子卻「變得好陌生，覺得屋企突然多咗個人，唔知我係邊個嚟」。他形容，當時聽到兒子這番話覺得很難受，但又無力改變。梓謙皺着眉說：「一開始根本都唔知點同佢傾偈，點樣溝通，點同佢玩。」他補充，由於手術後胸口有一半都是傷口，且體力不足，簡單如陪伴兒子到公園玩耍的能力都沒有，更不能抱起兒子。

眼見最親的兒子如今形同陌路人，梓謙又自感不懂與兒子相處的技巧，決定報讀課程學習更多育兒及講故事技巧，冀打動兒子。他最後花近兩年時間，成功用故事將兒子融化，重新接受他，關係更勝從前。