夏日炎炎，有咩爽得過咬番啖冰凍西瓜吖。之不過咁喎，大快朵頤還大快朵頤，最緊要打醒十二分精神，如果撞正睇得唔食得嘅「打針西瓜」，消暑消到入醫院，咁就掃興喇！
功夫茶唔係靠嚇o架。近排網上瘋傳一段西瓜嘔泡片段，只見西瓜表皮上有幾個好似針孔一樣嘅小洞，仲不斷流出白色泡沫，用水沖洗後冇耐又再嘔泡，真係睇見都毛管戙。據拍片人講，西瓜係購自深水埗一間生果店，西瓜上嘅封條寫上深圳一間農產品公司嘅名稱，懷疑係打針西瓜喎。
查實近年坊間一直有傳不法商人幫西瓜打針，人工製作超甜西瓜，只不過未有真憑實據咁解啫。你知喇，內地食品安全信譽麻麻，有毒食品無處不在，三聚氰胺冒充蛋白質，「牛肉膏」將豬肉變牛肉，五花八門，無奇不有，真係只有想不到，沒有做唔到，加多樣「打針西瓜」，有乜咁出奇吖。
不過業界人士另有講法，話今次問題西瓜未必係打針，估計係西瓜太熟腐爛，果肉發酵谷出嚟所致。又話如果在西瓜表皮直接打針，打針位置應該會出現黑點，如果有不法之徒使用添加劑，一般會喺種植時加入，而唔會等到收成，所以估計未必同打針有關喎。點講都好喇，正所謂病從口入，話晒都係食落肚嘅，梗係唔會攞自己健康較飛咁老襯o架。
即係咁，打針西瓜係真係假，暫時未有定論，但有一點可以肯定，內地產品質量一日冇改善，一日都係黑心食品嘅「頭號疑犯」。講起都幾奇怪，面對食安危機，港產官僚次次都係踢一踢至郁一郁，唔係靠外國示警，就係等傳媒揭發至補鑊，今次網絡傳到熱烘烘，當局居然零反應，踢咗都唔郁，仲有冇再離譜啲吖。
當然喇，奸商無分國界，問題食品其實唔係內地嘅「專利」，泰國啱啱爆出黑心榴槤醜聞，印尼上月亦盛傳有商販售賣含輪胎用塑化劑嘅假米。台灣啲黑心食品亦多到數唔清，除咗坑渠油，寶島製毒醬油、毒澱粉、劣質米、黑心鴨血等，食安醜聞鑊鑊新鮮鑊鑊甘。有毒食品行銷兩岸三地，同胞自相殘殺，簡直係中華民族嘅悲哀！
講多無謂，行動最實際。家陣食安警鐘長鳴，威脅無處不在，唔該食物安全中心班老爺替市民把好關，無論食品源自何方，都唔可以掉以輕心，除咗仔細檢查，更要堵塞漏洞，完善監管制度，特別係加重刑罰，實行告到班無良奸商傾家蕩產，否則點有阻嚇力吖。功夫茶都係嗰句，對草菅人命嘅奸商手軟，即係對市民殘暴嘅咋！