年輕人的激情歲月，一事無成嘅窮小子可以對超索嘅女友慷慨陳情：我情願做個犯錯的人，也不願錯過你。到真正一起面對現實的生活，無不是浪漫開始，悲劇收場！
勢估唔到政客也玩呢味，自抬身價，有人願意億億聲買佢一票，總之就是不願錯過你！然而，真相的背後卻是令人作嘔的鬼話連篇、厚顏無恥、裝瘋賣傻……阿哥，今後你在議事堂若然還站在道德高地對政改指指點點，對高官嘅誠信操守呼喝指罵，不是成為最佳荒謬劇嗎？
冇錯，老朽講嘅係社民連立法會議員梁國雄，佢為咗配合反中亂港嘅爛果報，竟公然捏造「億元買票」嘅謊言，然而，不到二十四小時又改口話億元買票係虛構，原因係若不提供具體數字，就不會引起傳媒報道，之後又改口死撐幾個月前有人開出足夠「養他兩世」嘅銀碼！
想不到堂堂「尊貴」嘅議員，竟然大話一個冚一個，阿哥，啲有波有籮有樣有學歷嘅艷星，出來「飯局」都係幾十萬起跳，你長毛乜料啊？竟然一億咁起跳！同文話齋：世界上最不值錢嘅東西恰恰就是政客，尤其是香港的小政客，根本難登大雅之堂；好心照吓鏡啦，想錢想到發瘋了，一億買一票？養你兩世、畀埋山頂大屋你住、建埋個足球場……再作大啲吖，笨！即使真係夢想不成真，起碼落得叫化子唱蓮花落——窮開心！當然，如今呢位「尊貴」嘅議員住公屋有近十萬人工，確實「窮」得開心快樂！
當年孔子學生子貢問如何治理政事，孔子答：足食、足兵、民信之矣。子貢又追問：若然不得已必須去掉一項，先去邊項？孔子話：去兵！再去？去食。信，國之寶也。
其實，信亦是每一個人立足社會之寶，身為議員，無信，可以休矣！選民經一事長一智，明年立法會選舉，凡我選民，應該知點做喇！