政改方案表決在即，立法會行政管理委員會尋日舉行近三小時會議，立法會主席曾鈺成會後宣布多招應對一連多日審議同表決政改，包括明日凌晨開始停止接待議員訪客，之前已進入大樓嘅議員訪客均必須離開，連政府當局都要預先將進入大樓嘅公職人員名字同數目告知立法會秘書處。其實立法會今次出招變相係「洗太平地」，明顯為咗嚴防議會內有人同示威者裏應外合，如果今次都仲有漏網之魚，甚至有人趁機興風作浪，立法會秘書長陳維安等人到時真係有排頭痛嘞！
