政情：陳恒鑌每個月半晝「爸爸日」
禮拜日就係父親節，小朋友梗係想有爸爸陪，但做議員嘅仔女就未必咁幸福。立法會議員陳恒鑌（Ben）就話，佢個女依家五歲，成日要求佢由下晝到夜晚陪住佢，但囡囡都要返學，得星期六、日得閒，偏偏撞正係佢落區嘅黃金時間，結果兩父女就約定每個月都會相處一個半晝時間，呢個咁珍貴嘅半晝，喺佢屋企叫做「爸爸日」。
囡囡會做晒功課等佢
阿Ben話，每逢「爸爸日」，佢太太就會一早通知女兒，等佢快快做好晒功課，預咗當日同爸爸玩。阿Ben講起個女就停唔到口，仲話囡囡嘅英文名Belle都係自己改嘅喎！個女咁得意，但係阿Ben就成日無時間陪佢玩，即使立法會休會，都只敢全家去短線旅行，例如台灣，仲試過去大嶼山住一晚就叫去咗旅行喇。忙成咁，難怪阿Ben都未敢生多個，怕照顧唔到喎！