今個星期係政改表決大戰，立法會行政管理委員會經評估後，就決定周三起關閉立法會餐廳三日。
立法會秘書處為咗班議員同議員助理有啖好食，決定設置訂飯盒服務，但選擇就極少，午餐仲有三款飯揀，但晚餐就獨沽一味，冇得揀。據聞初步反應麻麻，無乜議員助理肯「食住先」。
去年佔領期間，由於立法會外部分餐廳暫停營業，搞到個個議員助理都話無啖好食，今次連立法會內餐廳都關閉，所以秘書處今次都算細心，搵咗餐廳喺周三同周四兩日供應飯盒畀一班議員或者議助，每款三十蚊，價錢都算相宜。不過想買飯盒嘅人尋日就要落單兼畀定錢先。
此外，選擇都唔算多，午餐都叫好啲，起碼有三款飯畀人揀，但晚餐就得番一款，周三晚飯係冬瓜枝竹火腩飯，周四就係咖哩雞飯。我哋問過一班議助，似乎都無乜人肯揀「食住先」，寧願出去買飯或帶飯好過。