政情：呢舊雲匪夷所思

一舊雲經常不講則已，一開口就令人暈暈哋。佢追問處方會唔會派職員睇吓呢啲旅遊巴幾時到站，同睇吓選民嘅手手腳腳，會否寫上「掌心雷」、「腳心雷」、「手臂雷」，即係藏有投畀邊位候選人嘅提示。

葉國謙：未見過旅巴載人去投票

民建聯嘅葉國謙聽到一舊雲咁講忍唔住反駁，佢話由九一年參選區議會至今，未見過有大旅遊巴接載選民去票站投票，可能得一舊雲見過咁嘅情況。佢又話，除咗手、腳之外，唔知仲有咩地方可以驗掌心雷？總之聽完之後覺得匪夷所思。

雖然一舊雲嘅問題咁搞笑，難為選舉事務處總選舉事務主任李柏康依然耐心回應話，用交通工具接載選民並冇干犯法例，但使用交通工具接載選民去票站係提供緊服務同利益，假如促使選民投票畀某一候選人，就會觸犯選舉舞弊及非法行為條例云云。

「盲毛」仲問有冇檢控數字

不過，公民黨毛孟靜（正盲毛）仍然追問，有冇成功檢控一舊雲所講嘅情況？李柏康就話，由於選舉事務處唔係執法機關，所以冇相關數字。正盲毛問選舉機構拎檢控數字，一樣咁令人匪夷所思。

另外，新民黨葉劉淑儀問到有關喺社交媒體回應對手抹黑時，會唔會牴觸選舉法例。李柏康話，選舉廣告係有定義嘅，凡係促使或阻礙候選人當選、澄清某啲觀點係為咗促使自己當選，都屬於選舉廣告。候選人真係要小心處理，否則好容易就犯法。