芳艷芬唱戲——唔嫁又嫁，呢句歇後語用嚟形容港府防疫就啱嘞。面對南韓新沙士疫情一發不可收拾，港府開頭堅持唔發旅警，一味話旅遊健康建議已經足夠喎，點知唔夠二十四小時就自打嘴巴，改發紅色外遊警示。正如「東方報業民意調查」顯示，大部分受訪者批評港府防疫決策兒戲，指揮混亂，同搵市民條命較飛冇乜分別。
正所謂，見過鬼怕黑。香港經歷過○三年沙士慘痛一役，防疫梗係寧緊勿鬆喇，尤其南韓新沙士疫潮來勢洶洶，本港不斷出現疑似個案，港府係咪好應該嚴陣以待，釋除市民疑慮呢？可惜吖，當局反其道而行，唔肯直接發出紅色外遊警示，而係另創一套類似紅色旅警嘅旅遊健康建議，搞到市民及旅遊業界無所適從，退團退票糾紛不絕於耳，唔衰攞嚟衰。
港府可能終於知衰啩，翌日早上宣布改發紅色外遊警示，聲稱讓業界有所適從喎，咁即係承認之前嘅決定令人無所適從喇。問題係，當局啱啱先至話旅遊健康建議已經足夠，食衞局局長高永文仲四出解畫添，點知港府改口仲快過打針，唔止高永文瘀爆，仲凸顯部門之間零溝通，全無協調，呢場防疫戰點打吖。上述民調顯示，四成二受訪者不滿決策及指揮混亂；兩成三直斥發旅警兒戲，欠章法；兩成一批評防疫一時一樣。
咁又係呀，防疫唔係玩泥沙，稍一不慎就會搞出人命，點可以咁兒戲？早前一名南韓患者成功過境香港進入內地，就知口岸檢疫幾咁粗疏，家陣連港府官員都各自為政，全無章法，咁樣防疫叫人點放心喎？呢，日前一名從首爾回港發燒嘅女子，往青衣求診後被送院隔離，事件引起極大恐慌，假消息滿天飛，搞到青衣變死城不特止，股市仲一度狂瀉，證明防疫訊息唔清唔楚，真係好大鑊。
專家就講得啱嘞，當局於短時間內更改決策，予人訊息混亂、部門欠缺協調之感，做法極唔理想。不過咁，目前嘅外遊警示制度只針對天災人禍，並無納入醫療衞生問題，擺明係漏洞喇。上述民調又顯示，四成五受訪者認為制度不合時宜；三成五直指制度不完善；近一成直斥無法保障市民健康。有立法會議員建議港府將外遊警示同旅遊健康建議統一，減少混亂，唔係無道理。
話時話，南韓已經出現疑似第四手感染個案，距離社區爆發只係一步之遙。世衞一時力指南韓有能力抗疫，一時又改口稱當地疫情「龐大複雜」，真係乜都畀佢哋講晒。所以話，港府一味死抱世衞指引不放，唔出事係好彩嘅咋。