政情：有相為證：「白眉」田二少無法自拔

立法會議員田北辰（田二少）係貪靚之人，最近仲獻出首次修眉。田二少近日於社交網站圖文並茂話，最近隨同扶貧委員會其他成員去參觀一間培訓機構，其中有學員話試吓幫佢拔眉毛。佢透露，自己照鏡時都見到自己有啲白色嘅眉毛，但怕自己拔會痛，試拔又拔唔到；加上男人去美容院唔係咁方便，笑言畀人見到會無癮。因此對於有學員幫手即刻拔到，白色嘅眉毛即時冇晒，田二少都感到好滿意，而第時白色嘅眉毛一旦再現，佢話都會搵番嗰班學員幫手。