政情：盧思偉推「代用糉」惠長者
端午節將至，唔少人都鍾意買幾隻糉返屋企食應節，稻苗學會副主席兼「綠盒子」老闆盧思偉（Marco）早前就諗到延續「代用咖啡」及「代用飯」嘅概念，與志願福利機構合作於網上售賣代用糉，每賣出一隻佢哋就會捐多一隻，並計劃於端午節當日，到粉嶺祥華邨派發畀老人家。
其實「代用」概念就係購買完有關食物後，食肆會預留並轉派畀有需要嘅人士享用，而為響應近年健康嘅素食風氣，今次佢哋推出嘅「代用糉」就特別加入咗幾款唔同口味嘅高纖材料，包括藜麥、紫薯等，隨機派發，以致素食者都可以多個選擇。
講起食糉原來都有學問，Marco話，普通八寶或鹹肉糉可以加少少蛋煎一煎，香口好多；至於甜味嘅鹼水糉就可以切成一粒粒之後拎去曬乾，再用嚟當湯丸咁加落去煲糖水一流，口感煙煙韌韌。