政情：公文袋被本土潮淹沒
激進泛民近年勢力抬頭，唔止遊行示威時行動愈嚟愈激，仲經常打住「本土」旗號，部分更宣揚「港獨」思想，連泛民傳統政黨更疑被本土思潮淹沒，講緊嘅係泛民兩大政黨之一嘅公民黨（公文袋）。該黨黨魁梁家傑（袋巾傑）更表明，公文袋未來要將「本土」主流化，甚至將本土論述加入黨綱。估唔到以專業見稱嘅公文袋都要隨波逐流，畀本土思潮淹沒，認真令人唏噓。
抗中亂港竟稱「擁抱溝通」
近年本土思潮崛起，喺年輕一輩中有一定市場，袋巾傑唔知係咪睇中呢一點，早前接受訪問時話要將本土角度主流化，以此做出發點去審視教育、環保同城市規劃等問題。
佢批評，特區政府好多政策都係對內地「唯命是從」，民主派要思考一下點樣可以用本土思維去處理香港民生問題，其後更自爆等公文袋十周年黨慶時會公布一份聲明，到時會將本土論述加入黨綱，以回應社會最新發展。
公文袋打正旗號「本土化」，似乎係在所難免，但袋巾傑否認自己想搞「港獨」，又話支持本土同中央嘅立場睇法其實係冇必然衝突。佢舉例指，廣東省或者上海市領導都會為地方爭取利益，強調自己仍然「擁抱溝通」，又話無論叫佢「家傑又好、死硬派又好、抗中亂港又好」，自己溝通嘅心願都係不變咁話。
再選立會？回應模棱兩可
不過言猶在耳，佢就率先「開價」，要求中央放棄「香港有人勾結外部勢力」、「香港有人要搞『港獨』」等極傷感情同脫離現實嘅講法，咁先至會有溝通開始嘅第一步喎。
對於「後政改」嘅政局，袋巾傑都有連串睇法，當問及會否參選下屆立法會選舉時，佢斬釘截鐵咁講唔會，但轉頭又疑「改口」，話主觀意願係咪可以貫徹落實同執行，都要睇黨嘅安排同埋整個泛民嘅協調。佢其後更疑似意有所指，直言自己好有黨性。眾所周知，公民黨六名議員中有一半「另起爐灶」，袋巾傑上述言論係咪有弦外之音，答案似乎不言而喻。