中環出更：倡撤漁農界提委 黃成智惹火
民主黨（白鴿黨）前立法會議員黃成智因為力撐有條件政改「袋住先」，面臨被白鴿黨開除黨籍，但佢未有停落嚟，尋日仲聯同多名白鴿黨前核心及前成員舉行記者會公布最新政改建議，包括提出將提名委員會嘅漁農界取消，轉為大專學生界。漁農界立法會議員何俊賢（高佬賢）暗批有人多此一舉，反指黃成智隨時畀人踢出黨，呼籲對方唔好花心思喺呢一方面。
卿姐急劃清界線
據知除咗黃成智同狄志遠，白鴿黨前總幹事陳家偉、兩名白鴿黨前成員梁家裕同周奕希等人都支持呢個最新政改建議。當問及會否擔心被指再分裂白鴿黨，陳家偉話，最新方案係想爭取全部議員支持，唔係針對邊個政黨。不過，白鴿黨主席劉慧卿則強調，呢個方案唔代表個黨嘅立場，黨亦唔會支持佢哋嘅建議。
高佬賢接受查詢時話，聽到又有人話要取消漁農界就火滾，又話目前距離政改表決得番幾日，依家先提出方案根本係冇意思，倒不如努力說服白鴿黨增加對《基本法》同人大常委會「八三一」決定嘅認知仲好喎！
卓妮