中環出更：楊華勇冧靚妻自詡野獸
父親節就快到，好多人都會選擇出外慶祝，趁機享受天倫樂。尋日卓妮喺沙田馬場見到一班政商界名人，當中好多都已經諗定當日嘅節目。其中菁英會榮譽主席楊華勇（Johnny）話，父親節當日會約埋啲朋友一齊慶祝，人多先至夠熱鬧，而本月底則會同太太及兩個小朋友去澳門玩三日，事關當地有新酒店以「美女與野獸」為主題，佢仲為咗冧太太，笑笑口話自己係野獸，太太唔使講就梗係美女啦！
觀塘區議會主席陳振彬話，已經計劃好父親節同兩名兒子去行山，過一個健康星期日。佢認為，依家啲小朋友無論返學放學，都要經常對住個電腦屏幕，戶外活動又少，對眼想望遠啲都唔得，所以佢平日都不時帶小朋友去行山，等佢哋可以多啲望遠景，舒展眼部肌肉，雙眼都精靈啲，仲可以順便訓練埋佢哋體力。
陳裕光：每周都係父親節
大家樂集團主席陳裕光則話，個個星期都係父親節，皆因佢嘅仔女每個周日都會陪佢食飯，而父親節當日佢嘅仔女仲會帶埋啲孫過嚟同佢慶祝，三代同堂一齊歡聚，諗起都開心。
同場仲有仁濟醫院前主席嚴玉麟嘅大仔嚴子杰，話說今年係佢做咗爸爸後嘅第一個父親節，而尋日剛好係佢囡囡半歲生日。不過佢呢排忙住公幹，去完上海、瀋陽及廣州之後，即將又要去馬來西亞，父親節當日難得喺香港同摯愛一齊休息，就已經好滿足。
卓妮