政情：項明生遊「輻島」不設防
日本福島核事故發生超過四年，東北旅遊業仍一蹶不振。旅遊作家項明生（James）月前身先士卒，唔怕吸輻射，花一星期遊遍宮城、福島及岩手縣，入住福島一個農民家庭，品嘗當地人種植嘅米飯團。James話，睇見當地唔少靠旅遊業為生嘅家庭「拍烏蠅」幾年，好感慨。
笑稱百毒不侵
勇闖輻射區回來，James尋日以仙台國際旅遊宣傳大使身份，約班傳媒朋友食飯。佢笑言百毒不侵，遊訪東北時，只着上恤衫、牛仔褲，並無預備任何防輻射裝備。時值櫻花盛開季節，隨手拎起相機拍低路邊風景，都係一片花海。盛傳核放射物質會流入海洋，污染海產，James就膽粗粗，照食仙台吞拿魚及赤貝，又品嘗福島附近牧場出產嘅櫻花雪糕。