私人安老院醜聞多多，亂象叢生，有人形容係「虐老院」，真係一啲都冇講錯。原來除咗虐老之外，私人院舍僭建成風，安全隱患一籮籮，更加令人防不勝防。
根據社署○九年制訂嘅規例，安老院涉及僭建就會拒發牌照，但本報記者翻查紀錄發現，最少八間被社署指涉及僭建嘅院舍，一樣獲社署發牌，法例形同虛設，問你服未。
其中一間位於土瓜灣嘅安老院，牌照上寫住「僭建平台搭建物」，結果年年成功續牌。記者去現場睇過，懷疑僭建嘅露台淨係用屏風隔住，長者出出入入，睇見都牙煙。另一間位於紅磡嘅安老院仲誇張，被指僭建嘅石屎樓面板九九年已經存在，社署居然視而不見，淨係要求院舍每年提交檢查報告就算數，你話係咪兒戲吖。
咪以為呢啲只係個別現象呀，正如業界人士話齋，私營安老院藉僭建增加院舍面積，一方面可以改善設施，方便長者使用輪椅及學行架，另一方面可以吸納更多長者入住，提高收入。換句話講，院舍僭建唔止係公開嘅秘密，而且係普遍嘅現象。
即係咁，私人院舍在商言商，完全可以理解，問題係社署有法不依，執法不嚴，咁就好難卸責喇。立法會議員就講得啱嘞，有關規例原意係畀安老院舍有時間清除或修正僭建物，至今規例已經實施六年，社署無理由仲係隻眼開隻眼閉。試諗吓，萬一院舍因為僭建而出事，到時邊個孭鑊先？所以話，社署監管不力，同攞老人家性命較飛冇乜分別嘅咋。
話時話，社署之所以放軟手腳，對院舍僭建視若無睹，講到尾又係多一事不如少一事嘅心態作怪。係人都知，每年都有幾千名長者輪候政府資助宿位期間離世，如果社署下下拉人封舖，根本冇辦法安置受影響院友，私人院舍就係睇穿呢一點，知道社署「監管無力，釘牌無膽」，咪有恃無恐囉。
講嚟講去，都係港府冇腰骨，冇承擔，所謂「老有所依、老有所養」，純粹齋噏嘅咋。好似增加資助宿位咁吖，今年財政預算案預留七千一百萬經常性開支，增加二百幾個資助宿位咁大把，相對於大批輪候緊嘅長者而言，連杯水車薪都講唔上。最離譜嘅係，港府一味推卸責任，美其名鼓勵「居家安老」，其實乜嘢配套都冇，等於叫長者自己顧自己，簡直無良。
唔怪得有人話，香港長壽未必係福氣，隨時臨老唔過得世。咪話功夫茶唔提醒吖，人在做，天在看，港產官僚對長者涼薄，唔怕有報應咩？