政情：講本土 侯志強自認第二
有泛民團體揚言於立法會表決政改方案當日包圍立法會示威，有網民於社交網站發貼爆料，聲稱喺上水聽到「侯X強」同個後生仔對話，吩咐對方嗰幾日要搵多啲人，到時要扮本土派，並暗指要承認同新民主同盟范國威有關連。雖然網上貼文無指名道姓，但呼之欲出係指控上水鄉事委員會主席侯志強。侯接受查詢時否認講過呢啲說話，仲話講到本土，佢認第二冇人敢認第一。
對於網民發貼爆料嘅內容，范唔理真假，即時發聲明譴責建制派多次請人假扮示威者參與遊行示威，趁機搗亂嫁禍。侯隔空回應指，自己冇講過有關言論，直言如果有做過唔怕認，不過佢就唔會做啲咁無聊嘅事，真係唔知乜人咁睇得起佢喇。
氏族在港逾九百年歷史
講到本土派，侯志強仲自爆，佢哋姓侯嘅喺香港已經有九百卅八年歷史。當問及政改表決日會否到立法會請願，侯志強反問「無端端請乜願」。