政情：公文袋碎片化爐灶四起
民主黨（白鴿黨）元老張文光前日喺電台慨嘆香港泛民日漸「碎片化」，遲早變成一盤散沙、一事無成。不過，一向同白鴿黨爭緊做泛民大佬嘅公民黨（公文袋），近日就率先自行「碎片化」。該黨六名現任立法會議員，竟有多達半數先後另起爐灶。而且有關新組織嘅立場取態，仲同公文袋或其他黨友嘅定位完全南轅北轍。最嘆為觀止嘅係，該黨對有關問題竟可視而不見、見而不聞，令到近年不斷搞緊內鬥嘅白鴿黨睇到Ｏ晒嘴，都唔知應該苦笑定羨慕好。
聲稱搵第三條出路
正所謂黨內無派、千奇百怪，公文袋黨員出名缺乏黨性，六個議員開會可以有七個意見，仲不時互相明踩暗寸，最近仲紛紛自立門戶對着幹。前日郭家麒率先成立名為「蛋」嘅網上平台，倡議年輕人要認識同了解中國，擺明要同黨友毛孟靜創立嘅「香港本土」打對台。
到尋日又輪到「大口湯」湯家驊宣布聯同多名學者，成立名為「民主思路」嘅溫和泛民智庫平台，聲稱想喺現時極端政治對立嘅環境下搵到第三條出路，立場與公民黨黨魁梁家傑為首嘅激進抗爭路線剛剛相反。
問到若要喺公文袋同新平台之間二擇其一會點揀，大口湯就含糊其詞咁話唔係好想答，之後佢又話公文袋係個「多元同自由」嘅政黨，並點名指郭家麒同毛孟靜都有參與其他組織，相信個黨唔會只係針對佢喎。
黨對分裂視而不理
公文袋對黨內分裂隻眼開隻眼閉，令唔少白鴿黨中人羨慕不已，皆因白鴿黨黨員狄志遠（阿Dick）同前中委黃成智，早前先因為公開支持對政改「袋住先」而被清算。兩人單純講吓意見，都要被黨友深感遺憾同譴責，甚至被凍結黨籍兼面臨紀律調查，仲邊夠膽另起爐灶吖？所以之前有份同大口湯一齊開會籌組溫和平台嘅阿Dick，最終並無正式參與「民主思路」，似乎係嚇到驚咗。