中環出更：懷仔風波捱批 嫻姐「避世」
工聯會立法會議員陳婉嫻（嫻姐）最近因協助聲稱喺香港匿藏九年嘅十二歲無證男童懷仔一事，受到多方質疑批評，最近嫻姐更開始「避世」，免得再惹起新火頭。身為立法會福利事務委員會副主席嘅嫻姐，尋日一早通知立法會秘書處唔會出席會議，連累同屬工聯會嘅議員黃國健同鄧家彪要幫佢擋駕，其中黃國健一連多日負責接受傳媒訪問，為懷仔一事繼續解畫。
工記橫額錯寫「待」產假
不過，一波未平一波又起，最新有嫻姐肖像嘅橫額出事，畀人發現寫錯字。話說嫻姐同黃國健及工聯會社區幹事梁俊賢喺竹園社區會堂外掛咗一幅宣傳法定男士侍產假正式實施嘅橫額，但橫額就將「侍產假」寫成「待產假」。有人笑言真係唔知係咪因為等待「侍產假」太耐，因而出現手民之誤。
咁都未算，現場所見合共六幅有嫻姐肖像嘅橫額中，有三幅嫻姐嘅肖像都被鎅爛；相反黃國健同梁俊賢嘅肖像則完好無缺。唔通因近日嘅懷仔事件令嫻姐太惹火，再次成為被狙擊嘅目標？
卓妮