太公分豬肉就聽得多，水貨客分凍肉聽過未？嗱，「一簽多行」收緊為「一周一行」後，水貨集團唔止冇收斂，反而見招拆招，趁內地調低消費品關稅變陣，改為攜急凍牛扒北上，問你服未。
係咁嘅，上水呢個水貨集散地近日「華麗轉身」，變咗凍肉批發市場。近百水貨客當街「將冰山劈開」，分發凍肉，之後施施然過關交貨。記者現場所見，水貨客大模廝樣分凍肉，有人甚至帶埋小朋友開工添。
點解凍肉突然咁受歡迎？飲食業人士話喎，內地近排對優質牛扒需求甚殷，走私凍肉成為新財路。正所謂，重賞之下必有勇夫。由於偷運肉類進入本港屬違法，但出境就唔受規管，水貨集團就係利用呢個漏洞，以日薪過千元請人帶貨，吸引愈來愈多水貨客加入走凍肉大軍。家陣嘅問題係，大熱天時喺街邊分凍肉，一來影響行人，二來唔符合衞生，隨時病從口入o架。
面對咁嘅亂象，食環署例牌又係賊過興兵，水貨客下午四點散水，食署員工五點幾至出現，結果水貨就見唔到嘞，留低嘅包裝紙箱同膠袋垃圾就大把，執法好似做騷咁，簡直得啖笑。有立法會議員批評食環署隻眼開隻眼閉，「仲衰過hea做」，真係一啲都冇講錯。
話時話，當局之所以將「一簽多行」改為「一周一行」，目的就係打擊水貨活動，點知道高一尺，魔高一丈，水貨活動唔止冇減少，花樣仲多咗添。講到底，有需求就有市場，水貨喺內地有需求，水貨活動自然唔會消失喇。天下熙熙，皆為利來，走奶粉又好，走凍肉都好，無非都係為個錢字，要徹底杜絕水貨活動，邊有咁易吖。
歸根究柢，水貨活動之所以禁之不絕，皆因內地黑心食品層出不窮，連深圳官員都承認，水貨問題源於國產食品安全問題嚴重。所以話，黑心食品噩夢揮之不去，水貨活動都幾難消失。其實，事在人為嘅啫，如果內地當局決心整頓，黑心食品問題早就解決喇，點會搞到「中國製造」淪為假劣毒嘅代名詞吖。
一句講晒，蝕本生意冇人做，殺頭生意有人做。內地產品質量唔改善， 對境外貨品需求只會有增無減，莫講話改成一周一行，就算取消個人遊，水貨問題一樣存在，盞變成港人專利嘅啫。
知恥近乎勇，降低進口關稅又好，引入外國品牌都好，內地食品安全同產品質量一日唔提高，水貨問題一日唔會消失，中港矛盾亦一日唔會解決，遲早搞到兩地都冇運行吖！