政情：「雙飛」林凱章 怕醜唔認拍拖
早前有一日傍晚六點半，我哋見到幫手打理家族玩具生意嘅行政會議成員林健鋒兒子林凱章（Victor），喺中環ifc一間戲院排隊買飛。佢揀咗套票房勁爆嘅超級英雄電影，仲一次過買兩張飛，唔通同佳人有約？
睇戲搵工作靈感
Victor笑笑口話，睇戲只為咗搵工作靈感，事關佢哋生產嘅玩具多數係賣座電影入面嘅主角，佢近排收集緊嗰套超級英雄戲中人物嘅十二吋模型公仔。咁佢係咪順便約埋女仔拍拖睇戲呢？怕醜嘅Victor就話，依家仲未有女友喎！
不過Victor好識氹自己開心，佢見電影仲未開場，就行入一間咖啡專門店，仲同店員傾得好開心，最後扑錘買咗兩盒秘魯咖啡。Victor自爆係咖啡迷，平時乜嘢口味都會試吓，真係識歎。