支聯會前日喺維園舉行六四座談會期間，本土力量成員曾經同民主黨立法會議員兼支聯會主席何俊仁（AV仁）對罵，本土力量成員高舉「支聯會返支那」嘅紅色橫額，又叫AV仁返立法會睇AV，AV仁就反鬧佢哋係「土共」、「收錢」，雙方成員更發生推撞。本土力量發言人何志光尋日抗議雙非學童同港人爭學位期間，再翻AV仁舊帳，鬧AV仁唔做嘢，應該辭職。
何志光話，木土力量喺炎熱天氣下示威係「保護香港人」，反指AV仁背後有人支持，但未有任何實質行動，所以要求AV仁辭職，叫佢「返屋企睇AV睇飽佢」。另一邊廂，保衛香港運動發起人傅振中尋日出席一個政改研討會時，亦批評泛民主派堅決否決政改方案，因為收取「政治黑金」，係「為反對而反對」。佢又質疑AV仁︰「成日喺立法會恰眼瞓，AV仁究竟知唔知道八三一決定係講咩？」