政情：大局為重 創科局棄硬闖

拖咁耐 唔急於一時

就蓮塘／香園圍口岸工程撥款申請，大舊早前提過已經準備大量修訂，大家都以為會「有排玩」，但點知人力喺前日嘅財委會會議唔止鮮有發言，更連中止待續議案都冇提出，最後只係提出十七項修訂就收工，令撥款申請順利通過。有泛民中人透露，原來係因為大舊已經向財委會主席張宇人「摸底」，得悉政府唔會再抽起財委會原本議程、打尖提交創科局撥款申請，所以先肯讓路。

消息又話，因為政府早前已經為蓮塘／香園圍口岸工程撥款申請可以盡快喺財委會通過，夾硬抽起啟德體育園區等撥款申請，所以今次建制派已經表明，如果政府再為創科局抽起其他工務工程、甚至與民生相關嘅撥款申請，佢哋都好難再盲撐政府。故此政府考慮與其硬推創科局，搞到人力「拉布」、又不獲建制派支持，不如跟番原定議程先處理其他撥款申請，橫掂創科局已經拖咗咁耐，急都唔急於一時。

不過，財委會周五會審議多項工務工程撥款申請，政府亦疑似為政改方案讓路，取消原訂本月十九日舉行嘅財委會。距離暑假休會，財委會只剩三日合共四節會議，如果政府本月二十六日再提交創科局撥款申請，創科局分分鐘同樣再被「拉布」拉倒。

蘇錦樑正「遊走」德法

唔知係咪因為創科局暫時未能硬闖財委會，負責嘅商務及經濟發展局局長蘇錦樑（Greg蘇）零舍有興致，放心到德、法兩國外訪，掉低副局長梁敬國喺上周三處理創科局決議案，尋日仲去埋盛產葡萄酒嘅法國勃根地，參觀當地酒莊添，做局長做到佢咁，認真梳乎。