中環出更：慢必助理攻禾輋 欲收漁人利
區議會選舉臨近，建制派同泛民互撼嘅戲碼當然唔少得。按建制派內部協調機制，假如有泛民政黨加入戰團，建制政黨就兩個只能活一個，避免同區參選互相鎅票，反而益咗泛民。
民記經民聯互撼
不過，唔少建制派喺佔領行動後眼見選情大好，紛紛重新部署力捧新人落區，其中沙田禾輋邨選區就出現經民聯同民建聯（民記）互撼下，人民力量乘虛而入嘅情節。
禾輋邨現任區議員係民記余倩雯，我哋報道過經民聯亦派出社區幹事李德華頻頻落區試水溫，早已挑起民記敏感嘅神經，最近仲聽聞人力亦派出立法會議員陳志全（慢必）嘅助理李煒鋒，希望收鷸蚌相爭，漁人得利之效。人力有此舉動亦無他，皆因慢必早年喺同區嘅瀝源邨開設辦事處，深耕下儲落唔少支持者都唔出奇。
慢必當選後知名度大增，派助理小試牛刀亦不可輕視。近年區選愈趨政治化，泛民插足建制陣營即使搶唔到席位，都足以令建制派瞓得唔安樂。睇怕該區立法會議員葛珮帆同陳克勤都要畀啲力，余倩雯先有望成功連任。
卓妮