中環出更：「轉行」即時傳譯 楊立門重出江湖
去年六月底退休嘅民政事務局前常任秘書長楊立門（Raymond），話咁快就嚟復出再就業。Raymond尋晚喺香港大會堂為一場梁祝音樂會擔任友情客串嘉賓時爆料話，政府已批准佢下個月起可以做受薪工作。大家估吓歌喉媲美大明星嘅Raymond會做邊行？答案係做即時傳譯，相信唔少人都覺得意外。
Raymond話，佢將以自由人形式接即時傳譯工作，呢行好渴市，時薪逾千元。雖然佢唔係讀呢科，但升任工業貿易署署長之前，已經不時幫政府做即時傳譯。佢話呢種做法好普遍，唔少公務員都幫過手，尤其係去立法會，但時薪梗係冇市價咁高啦！
客串音樂會 與王憓擦出火花
講起做即時傳譯嘅趣聞，Raymond最難忘係回歸前，即黃宏發做立法局主席嘅年代。當時議員冇好似依家咁成日鬧交，亦唔會爆粗，但係有啲議員發言時詞不達意，或者前言不對後語，佢好怕被誤會係翻譯做得唔好。不過，講到最驚，冇嘢驚得過譯黃宏發講嘢，因為佢經常引述希臘神話，即時傳譯時真係好考工夫。
講返音樂會，「二胡王子」王憓（Ray）及鋼琴家張寶龍亦一齊演出，Raymond客串唱咗兩首歌，包括由Ray作曲、Raymond填詞嘅《為了愛》，呢首歌仲係第一次公開演唱添！Ray嘅父親二胡大師王國潼都有到場，Raymond太太亦現身支持。Raymond同王國潼父子相識多年，擦出火花梗冇難度啦！
卓妮