今年初成立、主打本土路線嘅「青年新政」未出戰區選就先脫腳，半年已經由成立之初嘅逾百人，走咗二十幾個成員，其中一個更係有意參選嘅核心成員。
已宣布退出青年新政嘅張文龍，批評組織內部管理不善，部分核心成員「打壓不合自己胃口、但其實有用的意見」，忽視內部出現嘅結構性問題，只顧「去瘀血、清理門戶、搞會內鬥爭」，實在愚不可及。
青年新政成立嗰陣聲勢浩大，表明劍指立法會議員葉國謙、梁美芬等「大佬」，但之後雷聲大、雨點小。有前成員話，青年新政拉雜成軍，唔熟選舉部署，黨內核心仲玩小圈子，睇唔到組織前景所以退出保平安。
青年新政召集人梁頌恆承認，可能組織太新，冇經驗亦唔夠時間，予人感覺內部管理不善，但就唔覺組織有內鬥或打壓意見。另外，早前積極發起退聯嘅中大本土學社召集人劉穎匡亦預告「七一」退出，唔通呢班佔領後冒起嘅組織都係來得快，去得快？