政情：大學生燒走支聯會40萬
支聯會前晚一如往年喺維園舉行六四燭光晚會，但今年受到本土派同親建制團體左右夾擊，令到參加維園集會嘅人數銳減至十三萬五千人，創下二○○九年以來新低。雖然到維園集會嘅人當中不乏年輕大學生，但佢哋竟然上台撕毀同焚燒《基本法》，呢啲激進行為唔單止令部分參加者反感兼提早離場，仲間接「燒」咗支聯會四十萬元捐款，支聯會今次可謂人財兩失。
每年六四晚會，都係支聯會同各黨派籌款嘅黃金機會。不過，隨住學界同本土組織各自另起爐灶，參加維園集會嘅人已經大為減少；加上有大學學生會代表喺台上高舉「命運自主、港人修憲」嘅標語，致詞後撕毀及焚燒《基本法》，有在場參加者覺得呢種行為騎劫咗集會嘅目的，質疑晚會變晒質，因而提早離場，令到集會情況雪上加霜，籌款金額亦唔多理想，反而其他政黨就盆滿缽滿。
蔡耀昌死撐因集會超時
支聯會副主席蔡耀昌尋日朝早接受電台訪問時，透露今年捐款比過往少咗大約三十萬元。不過，蔡耀昌事後再翻查數字，去年籌得一百七十多萬元，今年僅籌到一百三十萬元左右，應該少咗四十幾萬元至啱，跌幅達兩成幾。問到係咪同學生燒《基本法》有關，佢只係話人數跌咗兩成幾，同捐款嘅跌幅差唔多，而且有部分環節嘅時間比預期長，令集會唔能夠如期喺十點前結束，唔排除因為咁令到參加者提早離場。
捐款「他投」 其他黨派豐收
支聯會唔見錢，但各黨派嘅籌款金額都比去年增加，唔知係咪好多人睇唔過眼支聯會，所以轉而捐畀其他政黨？其中社民連同公民黨就成為咗最大得益者，前者今年籌得二十五萬元，較去年嘅十三萬元急增十二萬元，而後者則籌得二十九萬元，較去年多八萬元。社民連立法會議員梁國雄仲話，今年嘅「紅衫魚」（一百元紙幣）特別多。工黨亦籌得九萬多元，較去年增加一倍。