中環出更：醫學會民調「泰蔡」爭位前哨戰
香港醫學會尋日公布醫學界就政改方案進行嘅最新民意調查結果，今次係反對方案嘅人數佔多，故此會董兼前會長蔡堅話，民調可以為醫學界立法會議員「怪醫」梁家騮撐腰，應該跟民調投反對票喎。不過，會長史泰祖就唱反調，話怪醫係唔需要一定要跟民調投票。有傳蔡堅同史泰祖會喺明年立法會選舉爭奪醫學界議席，未到選舉已就政改民調打咗場前哨戰熱身。
投票意向各執一詞
醫學會嘅政改民調結果顯示，喺六千六百幾位受訪註冊西醫及牙醫中，百分之四十七點四表明支持方案，唔支持嘅有百分之四十九點七。佢哋亦喺學生會員中收返四百幾份問卷，當中一成七人支持方案，唔支持嘅就多達七成九。本身屬建制派嘅史泰祖就話，民調數據只係供政府同議員參考，又話學生唔係業界選民，而且學生睇法較「純真」，大人就會多啲考慮喎。
不過，一向同史泰祖唔多咬弦嘅蔡堅即唱對台戲，先賣口乖話民調結果反映香港醫生有腰骨、正直、唔自私，又話對學生會員嘅結果好高興，因顯示香港有將來，明言議員應該跟業界意見投票，即係叫怪醫投反對票。
卓妮