中環出更：進口水果之冠 港人愛葡萄
炎夏到，又係貪靚一族將生果當飯食嘅季節。台灣駐港機構尋日就趁台灣夏季水果當造，空運靚貨到港舉行一連十二日嘅特賣會。大家估吓，香港人去年食得最多嘅水果係乜？原來係葡萄。主辦機構台北貿易中心主任孫至誠話，香港去年入口三百幾億元水果，葡萄入口貨值排第一位，有三十五億元咁多。講笑咁講，香港咁多葡萄入口，點解港人仲經常「葡萄」人哋呢？
家族做果欄生意嘅香港青聯會董李挺話，其實過往市民食得最多嘅未必係葡萄，只係因為去年秘魯葡萄大豐收，又平又靚，識食又識計數嘅港人又點會錯過呢？現場亦有台灣彰化盛產嘅巨峰葡萄，台北經濟文化辦事處處長嚴重光見到即勾起唔少回憶。佢自稱係彰化人，讀高中時曾經到同學屋企嘅葡萄園玩，大家坐喺葡萄架下一邊抖涼，一邊摘葡萄食，諗起就好爽。
李大壯未達標 冇得食牛肉麵
「台灣女婿」港台商貿合作委員會主席李大壯都有到場，佢最鍾意食台灣番石榴，仲幾乎每日食一個。
最近佢聽聞超市有冷藏台灣冠軍牛肉麵賣，於是着太太去買，但結果佢冇得食，事關佢嘅體重雖已比高峰期減咗六、七十磅，但仍未達標，結果碗香噴噴嘅牛肉麵就畀咗阿仔食喎。
早前台灣接連爆發花茶殘留農藥超標嘅風波，兩年前代理台灣一個茗茶飲料品牌嘅賓仕洋行董事陳錦泉話，事件反映台灣政府提高咗檢測標準，亦加強為消費者把關，幸好消費者好快恢復信心。今年佢哋仍有開店計劃，年內將開多四間分店，增至全港十六間。
卓妮