好多人以為，自從九龍城寨變身公園後，香港已經不存在「三不管地帶」。其實，只要你到立法會大樓外嘅添美道睇吓，就知道香港仍然有三不管地帶，而且比當年嘅九龍城寨更加烏煙瘴氣添。
係咁嘅，舊年佔領行動結束後，添美道行人路有批帳篷一直未被清拆，佔領者拒絕離開不特止，仲不斷擴充地盤，家陣大大小小帳篷已增至一百五十個，甚至出現木屋碉堡，擺明想長期佔領。喺帳篷陣內，有人瞓覺，有人煮飯，有人種花，有人睇片，甚至連自修室都有埋，搞到七國咁亂，臭氣熏天。
係人都知，霸佔公眾地方係非法行為，小販阻街一陣咋，都被趕盡殺絕喇，何況添美道行人路被霸佔超過半年，唔通港府咁都當睇唔到？嗱，行政署只肯承認夏愨道沿政府總部大樓外牆嘅小部分行人路係由佢哋負責管理；地政總署指帳篷並非構建物，或牢固於政府土地，不屬於佢哋嘅執法範圍；食環署聲稱只負責清潔，處理帳篷和其他物品唔係佢哋嘅工作範圍；而警方就話要尋求法律意見，會密切監察情況，假如有違法行為，會嚴肅處理喎。
就係咁，幾個部門互相卸責，始終冇人肯出手，難為保安局局長黎棟國仲話會喺適當時候採取適當行動，一聽就知道係敷衍市民。堂堂立法會門外淪為藏污納垢之地，曱甴老鼠橫行無忌，警方過去半年收到逾三十宗造成阻塞嘅舉報，而食環署亦收到十一宗有關環境衞生嘅投訴，當局咁都仲唔採取行動，究竟幾時至係適當時候呢？唔通真係要等到佔領行動死灰復燃至嚟救火？
咪以為係危言聳聽吖，政改方案就快表決，反對派號召十萬人包圍立法會，到時就算只有幾千人響應，都可能好大鑊o架。當局有法不依，坐視帳篷陣不斷擴充，變相為佔領人士提供根據地，根本就係自製炸彈，唔衰攞嚟衰。最好笑嘅係，政改方案幾乎已肯定過唔到關，港府仲喺度約見反對派議員，話要撬票喎，簡直係浪費時間。
呢，當局可能知道有危機啩，近日先至喺政府總部外加裝三部閉路電視，其中一部對準添美道行人路佔領帳篷及木屋，另外兩部球體狀閉路電視可三百六十度環顧四周環境。可惜吖，表面上係加強監視，其實又係得個樣，帳篷內究竟有冇危險品，試問閉路電視又點可能睇到呢？講多無謂，行動最實際。要化解危機，最直接有效嘅做法就係盡快清除帳篷陣，還道路於市民，如果欺善怕惡，唔敢依法辦事，遲早自食苦果嘅咋！