孟子話孔子作《春秋》而亂臣賊子懼；亂臣賊子犯了罪行，驚被《春秋》記載下來，會受到當時和後世的恥笑和譴責而遺臭萬年，永世翻不得身也。老朽就話，無能高官則懼被東方報業集團踢爆，因為都係會變成「滾水灌老鼠洞──一個也跑不掉」！
你睇嗰位「亂世之標本」─—民航處處長羅崇文，自前年被本報獨家踢爆其連串大花筒及管理不善醜聞後，先後引起審計署及立法會關注並跟進調查，第二度被立法會帳委會以「強烈譴責和痛斥」炮轟，尤其係其「玩忽職守」，致使更換新航空交通管理系統延誤三年半。每年浪費公帑逾三千三百萬元；咁都算嘞，最令人不齒及憤怒嘅係──舊系統被迫繼續運作，嚴重威脅航空安全。
一個積小錯成大錯、積大錯成災難嘅庸官，除咗「痛斥」、「強烈譴責」外，公務員事務局若然唔跟進，對其作出適當嘅懲處；羅崇文Ｎ宗罪上身，確實罄竹難書，若然咁都唔使革職查辦，香港就真係無王管矣！
老朽話羅崇文係「亂世之標本」，如將民航處新總部變成「獨立王國」，最經典莫過於有豪華浴室、卡拉ＯＫ房及「鏡面大舞蹈室」，嘩！簡直有唐朝「黃巢之亂」時黃巾軍張角嘅氣勢：「蒼天已死，黃天當立」，民間甚至還有「皇帝輪流做，明年到我家」之語；難怪唐末的落第秀才黃巢更吟出：「待到秋來九月八，我花開後百花殺；沖天香陣透長安，滿城盡帶黃金甲。」
呢位羅崇文，濫用公帑、隻手遮天，果然有「滿城盡帶黃金甲」之氣勢！
如此混吉混帳嘅高官，政府若然不對其盡快採取紀律行動、革職查辦，對十多萬名現職公務員是一個極劣嘅垂範，對香港公務員嘅高效廉能必然係一記沉重嘅打擊！