唔使水晶球，大家都可以估到困擾香港多時嘅水貨問題將緩解直至最終消失，原因當然唔係激進分子搞驅蝗、光復有效，而係香港失去吸引力。隨住內地調低消費品進口關稅，內地客可以就近血拼，使乜山長水遠跑到香港花錢受氣吖。
唔係講笑o架，內地今日起降低部分服裝、鞋靴、護膚品、紙尿片等日用消費品進口關稅，平均降幅超過百分之五十。本報記者格過價，發現減稅後奶粉尿片呢啲搶手貨同香港售價相差無幾，仲邊有內地客專登來香港掃貨喎。少咗內地人購物，激進分子固然求仁得仁，但旅遊及零售業就慘嘞，業界人士甚至預料，香港免稅港嘅優勢可能喺一年後消失，你話閉唔閉翳吖？
眾所周知，香港之所以被譽為購物天堂，係因為實行零關稅，但近年本港租金及人工不斷飛升，價廉物美早就同香港絕緣，競爭力大不如前，家陣內地仲要調低進口關稅，香港仲有乜優勢可言呢？正如「東方報業民意調查」顯示，三成五受訪者直指本港營商成本高，削弱價格競爭力；兩成八人則擔心香港前景唔樂觀。
話時話，個人遊政策帶來財源滾滾，香港受惠極大。可惜社會泛政治化，中港矛盾愈演愈烈，部分人好似食錯藥咁，係都要對內地旅客「趕盡殺絕」，加上當局實施「一周一行」，進一步打擊內地旅客來港意欲。呢，好似今個五一咁吖，香港市面水盡鵝飛，店舖門可羅雀。唔怪得三成六受訪者認為殃及池魚，嚇走真正旅客；兩成八則指香港好客之都嘅旅遊聲譽受損。
數字唔會講大話，本港零售業總銷貨價值去年首次出現下跌，今年繼續拾級而下，首季下跌百分之二點三，簡直好似王小二過年，一年不如一年。冇錯，內地大力打貪，令旅客消費模式改變，之但係激進分子不斷趕客，唔通唔係零售數據跌跌不休嘅主因咩？今時唔同往日，中國愈來愈強大，內地旅客消費力愈來愈高，全世界都爭住搶客，加上周邊地區匯率大跌，內地旅客有大把選擇，香港仲玩「閉關鎖港」，同自毀長城冇乜分別嘅咋。
唔係危言聳聽，香港喺中國社科院綜合競爭力排名，十二年來首次失去冠軍位置，就知地位危危乎嘞。再講吖，內地制度愈來愈完善，購物愈來愈方便，淨係自貿區咋，喺全國遍地開花，香港只能斯人獨憔悴。冇計嘞，香港行衰運，一味內鬥內耗，甚至連一個無證兒童都唔放過，乜都要拗餐飽。逆水行舟，不進則退，睇嚟香港氣數已盡咯！