政情：公民講場：鬍鬚曾鬆口氣 陳家強布纏身

港府全力為命懸一線嘅政改方案拉票之際，財政司司長曾俊華（鬍鬚曾）就喺最新網誌話自己連鬆兩口氣，包括立法會上周四已三讀通過《2015年撥款條例草案》，仲趁機再次寄語議員明年不要再「拉布」。相對鬍鬚曾鬆一口氣，財經事務及庫務局局長陳家強就有排捱，事關先有蓮塘／香園圍口岸撥款申請直接闖關財務委員會，再有泛民主派事前張揚會就創新及科技局撥款「拉布」。依家陳家強就好似喺大海漂漂吓，望天打卦，都唔知幾時先至上岸嘞。