政情：黃以謙領悟區議員上位難
曾經應徵過副局長落選嘅精神科醫生黃以謙，早於九九年當選九龍城區議員至今，係較早一批走入政圈嘅專業人士，佢形容做區議員就好似做藝人。曾有數名藝人同娛樂公司高層同佢講，每次簽入二十個靚女，先有一個好似前港姐季軍佘詩曼咁紅，行錯一步就注定要做茄喱啡，如果做區議員嘅話，邊有二十個之中有一個跑出咁好命吖。
黃以謙於新書中透露，經常有人問佢作為專科醫生點解要做區議員，佢初時以為做區議員係政治「上位」捷徑，但做咗多年區議員先領悟此路不通。
向專業人士畀意見
佢其後提到，近年每隔數個月就有專業人士搵佢，請教應否參選區議員嘅意見。佢首先會問對方點解想做區議員，事關如果係為名或為權力，會叫對方諗清楚；如果係為見識人生百態嘅話，佢就會鼓勵去嘗試，因為會睇到香港政治真面目、學懂人生智慧喎。咁大感觸，唔通佢覺得自己嘅政途好坎坷？