政情：王賢誌錄英文發聲書傳愛
為提升學生對英語寫作嘅興趣，東華三院早前舉行全港校際「好人好事」英文故事寫作比賽，鼓勵學生發掘身邊感人故事，共有千多份參賽作品，最後九人勝出獲獎。雖然比賽結束，但東華三院搵來城中多位名人「聲演」得獎故事。天生一把洪亮聲線嘅東華三院副主席王賢誌（Vinci），就義不容辭幫手推出一發聲故事書，更拉埋另一副主席陳祖恒一齊「聲演」，讀出九篇觸動人心嘅得獎故事。
盼年輕人學純正發音
對於曾擔任大小活動主持嘅Vinci，錄書真係駕輕就熟，今次開咪講英文故事，有書照讀，絕對難佢唔到。Vinci話，希望年輕人學到純正發音之餘，同時透過聲音同文字，表揚關愛精神。話晒發聲書係心血，Vinci日前出席東華歷屆主席會午宴時，就畀大家先睹為快。歷屆主席會主席孫秉樞即場拎起支感應筆「嘟」吓本書，大讚好新奇，不禁話人生要活到老、學到老。