政情：建制兩子爭位 盞益泛民

原議員羅舜泉子代父出征

新富選區補選近日開始接受提名，率先報名嘅有報稱冇政治聯繫嘅羅曉楓，據悉羅曉楓就係羅舜泉個仔。有地區消息透露，大埔打鐵印原居民代表何萬傑及工黨秘書長郭永健都傾向出選。

之前我哋講過，建制派有意協調因落任大埔鄉事委員會主席而失落區議會當然議席嘅經民聯文春輝出選，但據悉文春輝已經同人講唔會出選。點解轉得咁快？原來同羅舜泉唔忿氣有關。有地區人士透露，羅舜泉現正就定罪上訴，有信心打得贏官司，所以就叫囝囝「代父出征」，但經民聯內部擺唔平呢件事，所以文春輝決定按照原訂計劃，年底考慮出選大埔區議會另一選區。

三人皆空降 選情冇路捉

不過，地區人士坦言，羅舜泉係因犯事被褫奪議席，即使搵兒子出選，選情估計會大打折扣，建制派惟有另派人出選，呢個就係何萬傑。何萬傑來頭都唔細，其父親何容生係大埔區議會前主席，亦做過大埔鄉事委員會主席。新富選區部分屬鄉郊地帶，何萬傑嘅鄉事背景對選情應該有利，而佢已獲大埔鄉事委員會、新界社團聯會等建制組織「祝福」。

雖然話兩名建制派人士爭位可能益咗泛民，但三人都係「空降」參選，冇往績可尋；加上呢次選舉係政改方案表決後首個選舉，政治議題或會影響選情，究竟邊個跑出實在好難講。