中環出更：女兒批不合格媽媽 葉劉慚愧
卓妮早前預告過新民黨上月三喜臨門。繼屯門區議員蘇嘉雯及葵青區議員徐曉杰分別出閣同做老襯後，南區區議員陳家珮（Judy）亦趕搭五月尾班車，前晚同政圈外嘅男友Ivan喺港島香格里拉酒店筵開四十幾席宣布做人妻。新民黨主席葉劉淑儀率領一眾黨員到賀，葉劉仲即場獲頒「最佳媽媽」大獎添。不過，葉劉就對獲獎感到慚愧，透露曾被女兒批評佢呢個媽媽唔合格，缺乏照顧女兒。
讚人妻陳家珮聰明
以一身黑色性感晚裝現身嘅葉太盛讚Judy係聰明女，識得喺工作同生活之間取得平衡，加上ＥＱ（情緒智商）高，相信日後工作即使愈來愈忙，都一定抽到時間陪老公，唔使佢親自教授「御夫術」喇！副主席田北辰就點醒Judy，大事可以自己決定，小事就由老公決定，但老公始終掌握大小事定義，暗示Judy事無大小都要聽老公話喎。講起求婚過程，Judy笑言直覺太準，一早估到對方會上摩天輪求婚，狠狠「踢爆」後，Ivan就喺屋企簡簡單單抱得美人歸。
卓妮