中環出更：楊志雄考的士牌傍身
香港中學文憑試下月就放榜，唔只學生緊張考試成績，家長亦好關心子女出路。卓妮尋日喺沙田馬場見到一班事業有成嘅政商界名人，唔知佢哋當年又係點樣規劃自己嘅人生呢？中華廠商聯合會副會長楊志雄（Johnny）就自爆，年輕時為咗多一條出路，連的士牌都考埋。
楊志雄話，父親當年賣收音機起家，可惜其後投資黃金失利；加上當年又冇儲蓄觀念，佢惟有努力進修搵出路，仲有殺錯冇放過，連的士牌都考咗先，以防第日搵唔到工都有門求生技能，好彩最後用唔着。為咗年輕人多啲出路，現時佢經常會帶學生參觀唔同類型廠房，等學生認識多啲唔同嘅發展可能性。
馮載祥籲青少堅定目標
立法會前秘書長馮載祥當年嘅情況就有啲唔同，佢話自細已經決心要做官，於是勇往直前努力讀書，其後如願以償做到政務官後梗係開心啦。佢覺得年輕人最緊要有清晰目標，只要想做就一定會做到，埋怨係冇用，要諗辦法實現先啱。
九巴董事雷禮權就話，受身邊朋友及同學影響，十幾歲時就已經好清楚自己將來要點發展。佢認為年輕人容易受到朋輩影響，如果身邊個個朋友一早規劃將來，自己自然亦會思考，所以揀到間好學校及識到目光遠大嘅朋友好緊要。不過，藝育菁英基金主席方黃吉雯就另有睇法，認為年輕人唔一定要用框框限住自己，應隨社會轉變而把握機會自由發展，多參考長輩意見及自我增值，總會搵到合適嘅出路。
卓妮